# У Беларусі затрымалі 10 прадстаўнікоў Bayer па справе аб нявыплаце падаткаў на 50 млн рублёў

- URL: https://syn.by/dziarzhava/sudy/bielarusi-zatrymali-10-pradstaunikou-bayer/
- Published: 2026-11-04T10:00:30+00:00
- Updated: 2026-11-04T10:00:31+00:00
- Section: Суды
- Language: be
- RU edition: https://syn.by/ru/gosudarstvo/sudy-ru/belarusi-zaderzhali-10-predstaviteley-bayer.md
- EN edition: https://syn.by/en/state/courts/bayer-representatives-detained-belarus.md

> Паводле зьвестак Сьледчага камітэту, сямёра з затрыманых грамадзянаў Беларусі і Расеі ўжо знаходзяцца пад вартай. Маёмасьць кампаніі і падазраваных арыштаваная на суму не менш за 8 млн рублёў.

![](https://syn.by/wp-content/uploads/2026/11/illustration-6177-1024x585.webp)

Сьледчы камітэт Беларусі паведаміў пра ўзбуджэньне крымінальнай справы ў дачыненьні да прадстаўнікоў нямецкага канцэрну Bayer і пра затрыманьне дзесяці чалавек. Афіцыйная прычына — ухіленьне ад выплаты падаткаў: паводле вэрсіі сьледзтва, сума перавышае 50 млн рублёў.

Справу вядзе Галоўнае сьледчае ўпраўленьне СК сумесна з Дэпартамэнтам фінансавых расьсьледаваньняў Камітэту дзяржаўнага кантролю. Яны заявілі, што спынілі проціпраўную дзейнасьць прадстаўнікоў кампаніі.

Сярод затрыманых, паводле зьвестак СК, грамадзяне Беларусі і Расеі. Сямёра зь дзесяці зьмешчаныя пад варту.

Паводле вэрсіі сьледзтва, кіраўнікі замежных кампаній Bayer і АТ «БАЙЕР» пры саўдзеле іншых асобаў са студзеня 2020 году па сакавік 2026 году вялі прадпрымальніцкую дзейнасьць бяз рэгістрацыі пастаяннага прадстаўніцтва. Гаворка, паводле зьвестак сьледзтва, ідзе пра продаж сродкаў абароны расьлінаў і фармацэўтычнай прадукцыі.

Сілавікі арыштавалі нерухомасьць і транспарт кампаніі, яе рахункі і рахункі замежных прадстаўніцтваў, а таксама маёмасьць падазраваных. Агульны кошт арыштаванага, паводле паведамленьняў, складае не менш за 8 млн рублёў.

Аблава ў Менску пачалася ў той самы дзень, калі ў Нямеччыне затрымалі двух беларускіх агентаў-дывэрсантаў. Паводле паведамленьняў, яны рыхтавалі тэрарыстычныя акты ў раёне Нюрнбэргу, а да гэтага ўзрывалі абаронны завод у Румыніі.

У сакавіку 2022 году Bayer паведаміла, што абмяжоўвае прысутнасьць у Беларусі і Расеі: спыняе выдаткі на маркетынг і інвэстыцыйныя праекты.