# Лукашэнка запатрабаваў ад судзьдзяў гатоўнасьці працаваць у ваенны час

- URL: https://syn.by/palityka/ulady/lukashenka-sudzdzia-hatounasc-pracavac/
- Published: 2026-11-19T14:35:51+00:00
- Updated: 2026-11-19T14:35:51+00:00
- Section: Улады
- Language: be
- RU edition: https://syn.by/ru/politika/vlasti/lukashenko-sudya-voennoe-vremya.md
- EN edition: https://syn.by/en/politics/authorities/lukashenka-demand-judges-work.md

> На нарадзе ў Палацы Незалежнасьці прэзыдэнт заявіў, што дзеяньняў судоў у гэтым кірунку «пакуль няшмат». Ён таксама ўказаў на рэгіянальныя перакосы ў пакараньнях.

![Аляксандар Лукашэнка — Лукашэнка запатрабаваў ад судзьдзяў гатоўнасьці працаваць у ваенны час](https://syn.by/wp-content/uploads/2026/11/alexander-lukashenka-8343-1024x585.webp)

Прэзыдэнт Беларусі Аляксандар Лукашэнка 19 лістапада правёў у Палацы Незалежнасьці ў Менску нараду з корпусам судзьдзяў і запатрабаваў ад судзьдзяў гатоўнасьці дзейнічаць ва ўмовах ваеннага часу. Гэта першая сустрэча кіраўніка дзяржавы з судзьдзямі пасьля сур'ёзных пераўтварэньняў у судовай сыстэме і працэсуальных нормах.

На нараду былі запрошаныя 250 чалавек з усёй краіны: вышэйшыя службовыя асобы, кіраўнікі дзяржаўных органаў, судзьдзі Канстытуцыйнага і Вярхоўнага судоў, Апэляцыйнага эканамічнага суду, абласных і Менскага гарадзкога судоў.

Лукашэнка заявіў, што ўся краіна «тэстуе і наладжвае алгарытмы ваеннага часу»: навучаюць і правяраюць вайскоўцаў, сілавікоў, тэрытарыяльную абарону і апалчэньне. Паводле яго слоў, ніхто ня хоча вайны, але гатовымі трэба быць да любога разьвіцьця падзеяў, і да гэтага, як ён сказаў, краіну змушаюць.

Паводле слоў прэзыдэнта, суды ня мусяць заставацца ўбаку ад падрыхтоўкі да ваеннага часу. Ён хоча ведаць, як суды будуць дзейнічаць у «асаблівы пэрыяд», пад якім разумее вайну. «Як судовая сыстэма бачыць сваю гатоўнасьць дзейнічаць у асаблівы пэрыяд? Гэта не рытарычныя пытаньні. Сёньня ў гэтым кірунку пакуль вашых дзеяньняў няшмат», — сказаў ён.

Разам з тым пытаньні пра падрыхтоўку судоў да асаблівага пэрыяду Лукашэнка назваў у пэўнай ступені надуманымі. Іх, паводле яго слоў, падымаюць прадстаўнікі сілавога блёку, якія лічаць, што ня мусяць заставацца ўбаку ад агульнай падрыхтоўкі краіны. «Што за асаблівы пэрыяд? Асаблівы пэрыяд — калі раптам вайна», — сказаў прэзыдэнт, дадаўшы, што працаваць трэба так, каб сыстэма «працавала, як гадзіньнік, і была як ніколі адзінай». Ён заявіў, што адзінства сыстэмы забясьпечаць усе органы ўлады і перадусім прэзыдэнт. Судзьдзям ён сказаў: «Вы на перадавой у гэтай працы».

Лукашэнка арыентаваў судзьдзяў на выключэньне бюракратызму і працу над памылкамі, зьвярнуў увагу на рэгіянальныя перакосы пры прызначэньні пакараньняў і ўказаў на асаблівае значэньне прававой абароненасьці прадпрыемстваў і дзяржавы ад санкцыяў. Ён адзначыў, што сказанае тычыцца ў тым ліку старшыні Вярхоўнага суду і генэральнага пракурора.

Прэзыдэнт нагадаў, што ў Беларусі былі ліквідаваныя ваенныя суды і пракуратуры: іх палічылі лішнімі для мірнага часу. 13 кастрычніка на нарадзе зь сілавікамі ён казаў: «Мы рыхтуемся да вайны, каб яе пазьбегнуць».
