З 4 сьнежня менскія паліклінікі спыняюць аказаньне плянавай мэдычнай дапамогі. Рашэньне прыняў камітэт па ахове здароўя Менгарвыканкаму на фоне другой хвалі COVID-19.
Пра тое, як цяпер будуць працаваць сталічныя амбуляторна-паліклінічныя ўстановы, расказала Ірына Талкачова, выконваючая абавязкі начальніцы аддзела першаснай мэдычнай дапамогі камітэту па ахове здароўя Менгарвыканкаму. Паводле яе слоў, акцэнт зьмяшчаецца на дапамогу пацыентам удома, у першую чаргу пажылым людзям, пацыентам з хранічнымі хваробамі і людзям з абмежаванымі магчымасьцямі.
Пацыентам са стабільным цячэньнем хранічных хваробаў па-за абвастрэньнем рэцэпты выпісваюць дыстанцыйна, тэрмінам да 6 месяцаў. Да хворых на COVID-19 і да людзей з тэмпэратурай выяжджаюць кантактныя брыгады: урач і мэдсястра альбо памочнік урача і мэдсястра. Яны бяруць мазкі з насаглоткі, аглядаюць пацыента, прызначаюць лячэньне і пры неабходнасьці выдаюць бальнічны ліст.
Тым, у каго тэмпэратуры няма, але, напрыклад, схапіла сэрца, ісьці ў паліклініку ня трэба. Талкачова сказала: «Калі ў чалавека няма тэмпэратуры, але зьявіліся, напрыклад, праблемы з сэрцам, яму ня трэба ісьці ў паліклініку, а варта патэлефанаваць у кол-цэнтар або кантактны цэнтар паліклінікі. Падрыхтаваныя спэцыялісты, у якіх ёсьць алгарытм апытаньня, высьветляць прычыну звароту і накіруюць урача або брыгаду. Такія пацыенты не застануцца без спэцыялізаванай мэддапамогі».
Выклікаць урача паліклінікі цяпер можна да 18.00, пазьней нагрузка кладзецца на хуткую дапамогу. Траўматалягічную і хірургічную дапамогу паліклінікі працягнуць аказваць: узімку імавернасьць такіх траўмаў павялічваецца.
Узмоцнены кансультацыйныя кабінэты гарадзкіх клінічных бальніцаў: профільных пацыентаў там прымаюць па накіраваньнях урачоў паліклінік. Афтальмалягічную дапамогу аказваюць у 3-й і 10-й бальніцах, атарыналярынгалягічную — у 4-й гарадзкой клінічнай бальніцы. Працягваюць працу раённыя кардыялягічныя цэнтры, прымае пацыентаў Менскі клінічны дыягнастычны цэнтар.
Цяжарныя застаюцца пад наглядам, але колькасьць наведваньняў жаночых кансультацыяў скарочана з улікам індывідуальных фактараў рызыкі. Школы падрыхтоўкі да цяжарнасьці і родаў працуюць анлайн.
Менскія паліклінікі ўжо спынялі плянавую дапамогу ў сьнежні 2020 году.
Вясной, у першую хвалю COVID-19, установы аховы здароўя таксама часова зьмянілі рэжым працы і максымальна абмежавалі плянавую дапамогу ў бальніцах і паліклініках.
Каментары
Каб пакінуць каментар, увайдзіце праз Telegram
Скануйце QR або адкрыйце Telegram:
Адкрыць у TelegramЧакаем пацьверджаньня…