Кафэтэрый і сталовая ГУМа ў Менску не працуюць 10 і 11 лістапада

У Менску часова зачынілі кафэтэрый на першым паверсе і сталовую на чацьвертым паверсе ГУМа. 10 і 11 лістапада яны не працуюць. Закрыцьцё адбылося пасьля скаргаў на тараканаў, пра гэта паведамляе агенцтва навінаў.

Установы 4 лістапада праверылі спэцыялісты Цэнтра гігіены і эпідэміялёгіі Цэнтральнага раёну, факты пацьвердзіліся. Кафэ і сталовую пастанавілі часова зачыніць, а датычна кіраўніка пачалі адміністрацыйны працэс.

На мінулым тыдні ў Threads зьявіліся дзьве скаргі на тараканаў у кропках грамадзкага харчаваньня ААТ «ГУМ». Адна тычылася кафэтэрыя на першым паверсе, другая — сталовай на чацьвертым.

Адна з карыстальніц паказала таракана на торце і зь іроніяй напісала, што ён «ацэньвае Паўлаву». Другая абурылася насякомым на сьцяне ўстановы: «Схадзілі зь сяброўкамі ў кафэ ГУМа».

Паводле зьвестак санслужбы, пасьля публікацыяў у інтэрнэце спэцыялісты праверылі аб'екты на праспэкце Незалежнасьці, 21, і вывучылі прадстаўленыя матэрыялы. Выкладзеныя ў публікацыях факты пацьвердзіліся.

Спэцыялісты паведамілі, што вынесены патрабаваньні пра прыпыненьне работ (паслуг) і пачаты адміністрацыйны працэс датычна адказнай службовай асобы. Паводле іх словаў, для рашэньня пра прыцягненьне вінаватых да адказнасьці правялі збор і аналіз доказных матэрыялаў.

Калі ўстановы адновяць працу, пакуль невядома.