Культура Музыка

Віртуальная сьпявачка Xania Monet стала найлепшай на першай прэміі AI Music Awards

Песьня Xania Monet стала першай кампазыцыяй ШІ-артыста ў радыёчарце Billboard. Пераможцаў выбіралі музыкі, якія самі выкарыстоўваюць ШІ.

Віртуальная сьпявачка Xania Monet стала найлепшай на першай прэміі AI Music Awards

У Лос-Анджэлесе 14 лістапада прайшла першая цырымонія AI Music Awards — прэміі за музыку, створаную з дапамогай штучнага інтэлекту, і за працу людзей, якія яе робяць. Галоўныя ўзнагароды атрымала віртуальная R&B-выканаўца Xania Monet: яна перамагла ў катэгорыях «Выканаўца года», «Песьня года» і «Альбом года».

Песьня Xania Monet стала першай кампазыцыяй ШІ-артыста, якая трапіла ў адзін з радыёчартаў Billboard. Адна зь песень праекту, How Was I Supposed to Know?, прыцягнула ўвагу музычнай індустрыі менавіта пасьля трапленьня ў гэты чарт.

Пераможцаў выбіралі музыкі, якія самі выкарыстоўваюць ШІ і ўваходзяць у Sonic Intelligence Academy. Гэтая арганізацыя распрацоўвае чарты для музыкі, створанай з дапамогай ШІ, і інструмэнты, якія дапамагаюць вызначаць такія кампазыцыі.

Вобраз Xania Monet стварыла Тэліша «Нікі» Джонс: яна сама піша тэксты, а затым з дапамогай ШІ ператварае іх у музычныя кампазыцыі. Паводле яе словаў, музыка, створаная з дапамогай ШІ, — новая зьява, да якой слухачам давядзецца прывыкнуць. Джонс перакананая, што гэты кірунак не зьнікне ў найбліжэйшы час.

Музычны прадусар Дрэйк Мерфі, уручаючы ўзнагароду за лепшую кампазыцыю ў стылі хіп-хоп, створаную з дапамогай ШІ, заявіў: «У сьвеце, дзе некаторыя называюць ШІ “падробкай”, чалавек, які стаіць за ім, — цалкам рэальны». Намінант Дж. Фрэквэнт сказаў: «Шмат што з таго, што мы робім за кулісамі, — гэта цяжкая праца, насуперак распаўсюджанаму меркаваньню… Мастацтва ёсьць мастацтва, і я думаю, што гэта толькі яшчэ адна яго праява».

Як піша Reuters, цырымонія прайшла на тле спрэчак пра аўтарскія правы і асьцярогаў, што генэратыўны ШІ выцесьніць людзей з музычнай індустрыі.

У чэрвені 2023 году «Грэмі» забараніла намінаваць творы, створаныя з дапамогай штучнага інтэлекту. У ліпені 2023 году Акадэмія гуказапісу заявіла, што ўзнагароду могуць атрымаць толькі стваральнікі-людзі, а праца без чалавечага ўнёску — не.

Каментары