Палітыка Апазыцыя
1 хв чытаньня

Іван Краўцоў абвясьціў аб запуску «Офіса Краўцова Івана» і сустрэўся з Мэтсолай

10 лістапада ў Эўрапарлямэнце Краўцоў абмеркаваў зь Мэтсолай палітвязьняў, санкцыі і падтрымку грамадзянскай супольнасьці. Мэтсола заявіла, што Эўразьвяз не аслабіць ціск на Менск.

Іван Краўцоў і Рабэрта Мэтсала — Іван Краўцоў абвясьціў аб запуску «Офіса Краўцова Івана» і сустрэўся з Мэтсолай
На ілюстрацыі: Іван Краўцоў і Рабэрта Мэтсала

Іван Краўцоў правёў першае пасяджэньне сваёй каманды і абвясьціў аб запуску «Офіса Краўцова Івана» (ОКІ). Сам Краўцоў заявіў, што бярэ на сябе ролю нацыянальнага лідэра.

Паводле заявы Краўцова, офіс будзе трымаць Беларусь у міжнароднай павестцы і працаваць з заходнімі партнэрамі дзеля вызваленьня Беларусі. Асновай працы названая «Праграма Краўцова: 11 вымярэньняў». Хто ўвойдзе ў склад каманды і якія канкрэтныя крокі ўключае праграма, не паведамляецца.

10 лістапада ў Эўрапарлямэнце Краўцоў правёў працоўную сустрэчу са старшынёй Эўрапарлямэнту Робэртай Мэтсолай. Бакі абмеркавалі пытаньні беларускіх палітвязьняў, санкцый супраць уладаў Лукашэнкі і падтрымкі грамадзянскай супольнасьці.

Мэтсола запэўніла, што Эўразьвяз стаіць на баку беларускага народу і прытрымліваецца доўгатэрміновай стратэгіі падтрымкі дэмакратычнага руху. Паводле яе слоў, Эўразьвяз не будзе аслабляць ціск на Беларусь, пакуль улады Лукашэнкі не пачнуць выконваць патрабаваньні беларускага грамадзтва.

Краўцоў — актывіст, якога ў траўні 2024 году завочна асудзілі на 11 гадоў пазбаўленьня волі. Завочны суд над ім пачаўся ў красавіку 2024 году, а ў студзені 2024-га Сьледчы камітэт распачаў у дачыненьні да яго асаблівую вытворчасьць.

Каментары