Зяленскі дапусьціў анлайн-выбары ва Ўкраіне, але назваў умову: рашэньне павінен знайсьці парлямэнт

Прэзыдэнт Украіны Ўладзімір Зяленскі заявіў, што Ўкраіна можа разгледзець правядзеньне выбараў у анлайн-фармаце. «Гэта магчыма, але парлямэнту давядзецца знайсьці рашэньні», — сказаў ён.

Пра гэта ён гаварыў у інтэрвію нямецкаму мэдыя ZDF Magazin Royal, адказваючы на пытаньне пра выбары ва Ўкраіне. Словы прэзыдэнта перадало ўкраінскае выданьне РБК-Украіна.

Паводле Зяленскага, для галасаваньня онлайн парлямэнт павінен прыняць адпаведнае рашэньне. Для гэтага, як ён заявіў, трэба ўнесьці зьмены ў заканадаўства.

У інтэрвію прэзыдэнт гаварыў таксама пра выклікі, якія нясе вайна.

Цяпер галасаваньне онлайн ва Ўкраіне немагчымае, паведаміла ўкраінскае выданьне zn.ua.

Зяленскі падкрэсьліў, што цяперашнія ўмовы не дазваляюць тэхнічна арганізаваць справядлівае і бясьпечнае галасаваньне для ўсіх украінцаў. Ён адзначыў, што ў выпадку выбараў ёсьць значная частка грамадзянаў, якія не змогуць прагаласаваць. Арганізаваць такое галасаваньне ва ўмовах вайны будзе вельмі складана.

У лістападзе 2024 году Зяленскі заявіў, што ва Ўкраіне не будзе выбараў у ваенны час. У сакавіку 2026 году ён сказаў, што ў яго няма дыялёгу па законапраекце пра выбары.