Віцебская міліцыя адказала на гісторыю з даносам на вядучага Савельева і прыгразіла крымінальнай адказнасьцю за публікацыі

УВД Віцебскага аблвыканкаму апублікавала сваю вэрсію гісторыі зь вядучым Віталём Савельевым. На яго паскардзіліся ў міліцыю пасьля жартаўлівай «пражаркі» калегаў на сустрэчы работнікаў вясельнай індустрыі.

Сам Савельеў расказаў у TikTok, што на яго напісалі заяву пасьля выступу на штогадовай сустрэчы работнікаў вясельнай індустрыі. Паводле яго слоў, падчас «пражаркі» ён жартаваў пра калегаў, а празь дзьве гадзіны прыехала міліцыя.

Паводле зьвестак УВД, у чат-бот МУС «Мы заўсёды побач!» паступіла паведамленьне: у адной з устаноў Віцебскага раёна 38-гадовы вядучы на карпаратыўным мерапрыемстве выказаўся пра калегу ў непрыемнай форме, у тым ліку з ужываньнем ненарматыўнай лексыкі.

Паводле сьцьверджаньня міліцыі, заяўнік паведаміў таксама, што вядучы асуджаў узаемадзеяньне калегі зь дзяржаўнымі арганізацыямі ў прафэсійнай дзейнасьці.

Савельеў расказаў, што невядомы адправіў у чат-бот МУС запіс яго выступу і абвінаваціў яго ў «абразьлівых выказваньнях палітычнага характару». Ён сьцьвярджае, што пра палітыку гаворка не йшла.

Паводле яго слоў, штогод напрыканцы вясельнага сэзону вядучыя праводзяць «Сэйшн» — сустрэчу тых, хто працуе ў індустрыі, каб адзначыць канец вясельнага марафону. «Традыцыйна на такім мерапрыемстве мы робім «пражарку» — фармат такіх жорсткіх жартаў адзін пра аднаго», — сказаў Савельеў.

Цяпер праводзіцца праверка, паводле вынікаў якой дзеяньням Савельева дадуць прававую ацэнку. Тэрмін яе завяршэньня не названы.

Асобна УВД папярэдзіла пра адказнасьць аж да крымінальнай за публікацыі ў інтэрнэце, якія, на думку ведамства, скажаюць уяўленьне пра здарэньне. Міліцыя не ўдакладніла, якія зьвесткі лічыць недакладнымі і да каго зьвернута папярэджаньне. Ведамства нагадала, што публічныя паклёп і зьневажаньне ў інтэрнэце перасьледуюцца паводле закону: магчымая як адміністрацыйная, так і крымінальная адказнасьць.