У Гомельскай вобласьці 15 кастрычніка ў 11:00 правераць апавяшчэньне праз Cell Broadcast

У Гомельскай вобласьці з 13 па 15 кастрычніка ладзіцца комплексная праверка аўтаматызаванай сыстэмы цэнтралізаванага апавяшчэньня грамадзянскай абароны. Яна прадугледжвае ўключэньне электрасырэнаў.

Галоўны дзень праверкі — 15 кастрычніка, яна пройдзе, у тым ліку, у Гомелі. Паводле паведамленьняў у Telegram-каналах, на Гомельшчыне пры гэтым пратэстуюць сыстэму апавяшчэньня пра надзвычайныя сытуацыі новага пакаленьня.

15 кастрычніка з 11:00 у вобласьці будуць правяраць сыстэму апавяшчэньня Cell Broadcast. Пра гэта паведамляюць дзяржаўныя СМІ Беларусі, адразу некалькі выданьняў.

Ігар Рыжоў заявіў, што ў вобласьці ўпершыню будзе выпрабаваная сучасная тэхналёгія апавяшчэньня насельніцтва.

Як паведамляюць недзяржаўныя беларускія выданьні, тэставаньне пройдзе толькі ў сетках мабільных апэратараў 4G. Пакуль невядома, якія акурат апэратары вобласьці ў ім удзельнічаюць.

Гомельскае абласное ўпраўленьне МНС просіць насельніцтва на час праверкі захоўваць спакой, заставацца на сваіх месцах і не прадпрымаць ніякіх дзеяньняў.

Паводле паведамленьняў, жыхары і госьці вобласьці атрымаюць паведамленьне ад МНС пра тое, што праводзіцца праверка мабільнага апавяшчэньня. Галоўная рэкамэндацыя на гэты час тая ж: заставацца на месцы, ніякіх дзеяньняў не патрабуецца.

Тэст Cell Broadcast праводзяць дадаткова да праверкі з уключэньнем электрасырэнаў, у 11:00 15 кастрычніка.

Паводле тых жа паведамленьняў, падчас апрабацыі будуць правяраць працу сцэнароў аўтаматычнага запуску апавяшчэньня ў зададзены час.

Cell Broadcast — тэхналёгія перадачы паведамленьняў на мабільныя тэлефоны. Апавяшчэньні прыходзяць практычна імгненна і дазваляюць ахапіць усіх абанэнтаў у пэўнай зоне.