У Літве затрымалі дваіх мужчын пасьля прызямленьня паветранага шара з 3000 пачкаў цыгарэт зь Беларусі

У Вільнюскім раёне Літвы памежнікі выявілі паветраны шар з 3000 пачкамі беларускіх цыгарэт. Кошт грузу з улікам падаткаў складае 16530 эўра.

Шар прызямліўся ў полі каля вёскі Лаўкінінкай, менш чым за два кілямэтры ад мяжы зь Беларусьсю. Побач памежнікі знайшлі Volkswagen Passat, на якім, меркавана, па кантрабанду прыехалі двое мужчын — 37 і 20 гадоў. У машыне ляжалі прыбор начнога бачаньня, два нажы і разак. Абодва мужчыны затрыманыя.

Кантрабандныя шары з тэрыторыі Беларусі зьяўляліся ў літоўскім небе і раней. У чэрвені 2024 году ў пункце пропуску «Шальчынінкай» заўважылі вялізны паветраны шар з грузам, хутчэй за ўсё цыгарэтамі. У красавіку 2026 году зь беларускай тэрыторыі запусьцілі шары кантрабандыстаў, якія ўвайшлі ў паветраную прастору Літвы.