У Менску зносяць прыватныя дамы на вуліцы Арлоўскай: першы этап зьвязаны з будаўніцтвам мэтро

У Менску зносяць прыватныя дамы на вуліцы Арлоўскай. Будаўнічая тэхніка разьбірае першыя сядзібы, а на вызваленых участках ідзе расчыстка тэрыторыі.

На першым этапе пад знос трапілі 17 прыватных сядзібаў на 7-м Арлоўскім завулку і суседніх 4-м і 5-м завулках. Знос прыватнага сэктара ў раёне вуліц Гая і Арлоўскай пачаўся ў кастрычніку.

Пад знос трапілі каля 20 прыватных дамоў у 4-м, 5-м і 7-м Арлоўскіх завулках, а таксама ў межах вуліц Шчадрына, Гая і Арлоўскай. Працы ідуць на ўчастку ад Арлоўскай да вуліцы Шчадрына.

Прыватную забудову на Арлоўцы будуць зносіць этапамі. Першы этап зьвязаны з будаўніцтвам мэтро.

Гаспадары дамоў ужо выселіліся. Яны атрымалі грашовую кампэнсацыю або кватэры ў сталічных новабудоўлях.

У пакінутых дамах перакрылі газ. Некаторыя пабудовы адключылі ад камунікацыяў і дэмантавалі.

На месцы прыватнага сэктара плянуюць зьнесьці больш за 400 сядзібаў і ўзьвесьці больш за 270 тысяч м² жытла, а таксама школу, дзіцячыя садкі і буйны гандлёвы аб'ект.

Пытаньне аб зносе Арлоўкі падымалі і раней: у сакавіку 2025 году горадабудаўнікі ўносілі зьмены ў дэталёвы плян тэрыторыі ад вуліцы Нававіленскай да Гая, дзе прадугледжваліся шматпавярхоўкі, тунэль і станцыя мэтро. Грамадскае абмеркаваньне праекту тады праходзіла ў Цэнтральным раёне Менску.

Відэа зносу аднаго з дамоў на Арлоўскай апублікавалі ў Threads 27 кастрычніка. Кадры працы будаўнічай тэхнікі выклалі і мясцовыя жыхары.

Наступным этапам стане вызваленьне ўчастка пад шматкватэрны дом. Кватэры ў ім плянуюць вылучыць, у тым ліку людзям, якіх перасяляць з прыватных дамоў.