У Польшчы арыштаваныя двое грамадзян Польшчы, якія забіралі цыгарэты зь беларускімі акцызнымі маркамі, дастаўленыя шарамі

Памежная варта Польшчы паведаміла пра затрыманьне двух грамадзян Польшчы, якія спрабавалі забраць цыгарэты, дастаўленыя зь Беларусі па паветры. Апэрацыю на тэрыторыі гміны Міхалова правялі супрацоўнікі памежных застаў у Бабровніках і Міхалове Падляскага аддзела ведамства.

Затрыманыя 51-гадовая жанчына і 38-гадовы мужчына, жыхары адной з прыгранічных гмінаў.

Памежнікі выявілі пакунак з 1500 пачкамі цыгарэт зь беларускімі акцызнымі маркамі. Іх кошт перавышае 40 тысяч злотых, гэта каля 10200 даляраў ЗША. Паводле інфармацыі ведамства, для кантрабанды выкарыстоўваліся мэтэаралягічныя шары.

Затрыманым прад'яўленыя абвінавачваньні паводле Крымінальна-фіскальнага кодэксу, паводле закону пра асаблівыя захады супрацьдзеяньня падтрымцы агрэсіі супраць Украіны і абароны нацыянальнай бясьпекі, а таксама паводле закону пра авіяцыйнае права. Паводле паведамленьня памежнай службы, ім пагражае не менш за тры гады пазбаўленьня волі.

Раённы суд Беластока ўзяў мужчыну пад варту на два месяцы, жанчыну — на месяц.

Паводле інфармацыі памежнікаў, высьвятляюцца дадатковыя акалічнасьці здарэньня і іншыя магчымыя ўдзельнікі кантрабанднай схемы.