Пяты выпуск Віленскае Беларускае Гімназіі

Выпускныя экзамены ў Віленскай Беларускай Гімназіі скончыліся. З агульнае лічбы 22 вучняў восьмае клясы дапушчаны былі да экзаменаў 20. Вытрымалі экзамены 19.

Склад нашых матурыстаў быў сёлета гэтакі: хлапцоў—6, дзяўчат—13. Па веры: 10 праваслаўных, 1 каталік, 7 юдэйскае веры, 1 лютаранін. Па нацыянальнасьці: беларусаў—11, жыдоў—7, іншых—1.

Цікава прасачыць лічбу матурыстаў гімназіі за мінулыя гады:

у 1920 г. скончыла 16, у тым беларусаў 25%
у 1921 г. „ 42, „ „ 28,5%
у 1922 г. „ 36, „ „ 28%
у 1923 г. „ 28, „ „ 50%
у 1924 г. „ 19, „ „ 58%

За ўсе пяць гадоў скончылі Віленскую Беларускую Гімназію 141 матурыст (59 хлапцоў і 82 дзяўчаты).

У восені для беларускіх матурыстаў мае быць вызначана ўрадовая камісія, якая вытрымаўшым перад ёй дзяржаўны экзамен мае выдаваць атэстаты сьпеласьці, важныя для унівэрсытэтаў у Польшчы. Паміж Гімназіяй і Кураторыумам ідуць перагаворы аб варунках і межах гэтых экзаменаў.