У Барысаве аўтапарк не знайшоў парушэньняў у дзеяньнях кандуктара, якая высадзіла школьніцу. Маці дзяўчынкі з гэтым не згодна

Жыхарка Барысава расказала ў Threads, што яе 16-гадовую дачку высадзілі зь гарадскога аўтобуса №3А. Паводле жанчыны, прычынай стала забытая дома даведка, якая дае права на льготны праезд. Канфлікт, паводле яе зьвестак, адбыўся каля 11:50.

Аўтапарк пасьля праверкі заявіў, што парушэньняў у працы кандуктара няма. Маці сьцьвярджае адваротнае, а запіс, на які спасылаецца аўтапарк, ёй не паказалі.

Паводле жанчыны, дачка спазьнялася на дадатковыя заняткі і ў сьпешцы забыла дома кашалёк і даведку.

Маці піша, што кандуктарка дазволіла сабе фразы кшталту «панаехалі зь Менску і катаюцца бясплатна», калі дзяўчынка паказвала фота клясы. Паводле яе слоў, кандуктарка вельмі груба размаўляла зь дзяўчынкай і штурхнула школьніцу. Заплаціць за дзяўчынку хацела пажылая пасажырка, але кандуктарка грошай не ўзяла і працягвала крычаць на ўвесь аўтобус.

У выніку дзяўчынка выйшла на тры прыпынкі раней і вярнулася дадому замёрзлая і заплаканая, кажа маці. Яна сьцьвярджае, што кандуктарка накрычала на дачку пры ўсіх у салёне і давяла яе да сьлёзаў.

Маці папрасіла кіраўніцтва аўтапарку пагаварыць з пэрсаналам пра культуру зносінаў.

У барысаўскім аўтобусным парку №3 праверылі паведамленьне пра інцыдэнт і вывучылі запіс з камэры відэаназіраньня. Паводле высновы кіраўніцтва, кандуктарка ў канфлікт з пасажыркай не ўступала, а штуршка не было.

У аўтапарку заявілі: «Падчас гутаркі пасажырка карысталася мабільным тэлефонам, на заўвагі кандуктара не рэагавала. У выніку праверкі працы кандуктара парушэньня культуры абслугоўваньня пасажыраў не выяўлена». Сам відэазапіс аўтапарк не прадставіў, а толькі скрыншоты.

Кандуктарка патлумачыла, што папярэдзіла школьніцу: праезд без даведкі або квітка — парушэньне. Паводле яе слоў, дакумэнта на льготу ў дзяўчынкі не было, а грошай пры сабе таксама не знайшлося. У аўтапарку нагадалі, што школьнікі езьдзяць бясплатна з 1 верасьня па 30 чэрвеня толькі пры прад'яўленьні даведкі. Там жа паведамілі, што з кандуктаркай правялі гутарку.

Гісторыя выклікала спрэчкі і бурнае абмеркаваньне ў сацыяльных сетках.